ដោយ ជា មករា
មនុស្ស ពីរនាក់ត្រូវបានឃាត់ខ្លួនជាបណ្ដោះអាសន្ន នៅថ្ងៃអាទិត្យ ១៧ សីហានេះ ខណៈដែលអាជ្ញាធរក្រុងភ្នំពេញ ធ្វើការបង្ក្រាបរារាំងក្រុមបាតុករដែលបម្រុងដើរជាក្បួនប្រឆាំងនឹង ការឈ្លានពានរបស់ថៃ មកលើទឹកដីកម្ពុជា តាមបណ្ដោយព្រំដែនរវាងប្រទេសទាំងពីរ។
RFA Photo/Chea Makara
កម្លាំង នគរបាលនិងបាតុករប៉ះទង្គិចគ្នា នាថ្ងៃទី១៧ សីហា ២០០៨ ខណៈដែលកម្លាំងនគរបាលព្យាយាមរារាំងមិនឲ្យបាតុករធ្វើការប្រមូល ផ្ដុំដើម្បីដើរហែក្បួនប្រឆាំងការឈ្លានពានរបស់ថៃមកលើទឹកដី ខ្មែរ។
បុគ្គលិកសហជីពសេរីកម្មករកម្ពុជា និងអ្នកបើកបររថយន្តដឹកទឹកសម្រាប់បាតុករ ត្រូវបានឃាត់ខ្លួន ហើយបញ្ជូនទៅសាលាខណ្ឌដូនពេញ ហើយក្រោយមកត្រូវបានដោះលែងវិញ នៅវេលាម៉ោង ៣រសៀល បន្ទាប់ពីបានសរសេរកំណត់ហេតុនិងការចរចាជាមួយនឹងមេដឹកនាំបាតុកម្ម។
ក្នុងការបង្ក្រាបនោះ មានការប្រទូសរ៉ាយគ្នាមួយឈុតរវាងក្រុមបាតុករនិងនគរបាលបង្ក្រាប បាតុកម្មដែលមានកាន់ខែល ដំបងឆក់ ហើយមេដឹកនាំក្រុមបាតុកម្ម គឺលោក រ៉ុង ឈុន បានចោទថា ក្រុមនគរបាលបានប្រើដំបងឆក់ ឆក់រូបលោក ត្រូវដៃខាងស្ដាំ។
បាតុកម្ម ដែលទទួលបានបរាជ័យនោះ ដឹកនាំដោយលោក រ៉ុង ឈុន ប្រធានសហភាពសហជីពកម្ពុជានិងជាប្រធានសមាគមគ្រូបង្រៀនកម្ពុជា ឯករាជ្យ និងលោក ជា មុន្នី ប្រធានសហជីពសេរីកម្មករកម្ពុជា ហើយបានគ្រោងថា នឹងមានមនុស្សប្រមាណ ៣០០នាក់ចូលរួមដង្ហែក្បួនពីរដ្ឋសភាចាស់ ដែលបច្ចុប្បន្ន ជាទីស្ដីការគណៈរដ្ឋមន្ត្រីបណ្ដោះអាសន្ន ឆ្ពោះតាមមហាវិថីនានា ទៅកាន់ស្ថានទូតថៃ ហើយធ្វើការប្រគល់ញត្តិដល់ស្ថានទូតទាមទារឲ្យមានការដកកងទ័ពថៃចេញ ពីតំបន់ប្រាសាទព្រះវិហារខ្មែរ។
លោក រ៉ុង ឈុន ចោទថា អាជ្ញាធរបានរារាំងអ្នកចូលរួមធ្វើបាតុកម្មគ្រប់ផ្លូវ មិនឲ្យមកជួបជុំគ្នាបាន ៖ «នៅតាម ដងផ្លូវច្រកចូលឆ្ពោះមកកន្លែងបាតុកម្មយើងនេះ ត្រូវបានប៉ូលិសរារាំង ហើយនិងមានឃាត់ខ្លួនដល់បាតុករ អ្នកដែលមានបំណងមកចូលរួម»។
បន្ទាប់ពីមានការរារាំងនៅមុខរដ្ឋសភាចាស់ លោក រ៉ុង ឈុន និងលោក ជា មុន្នី បានប្ដូរគម្រោងធ្វើបាតុកម្ម ចេញពីអតីតរដ្ឋសភា ដោយចាប់ផ្ដើមចេញដំណើរពីការិយាល័យសហជីពសេរីកម្មករនៃ ព្រះរាជាណាចក្រកម្ពុជា ដែលមានទីតាំងស្ថិតក្នុងសង្កាត់បឹងកេងកង៣ ខណ្ឌចម្ការមនឯណោះវិញ។ នៅទីនោះ នគរបាលនិងកងកម្លាំងប្រដាប់អាវុធ បានបិទផ្លូវចេញចូលនិងបានរាំងខ្ទប់ក្រុមបាតុករ មិនឲ្យចេញពីការិយាល័យសហជីពសេរីកម្មករនោះបានឡើយ។
ស្នងការនគរបាលរាជធានីភ្នំពេញ ឧត្តមសេនីយ៍ ទូច ណារ៉ុថ ដែលបានដឹកនាំកម្លាំងចុះបង្ក្រាបបាតុកម្មនោះ បានមានប្រសាសន៍ថា អាជ្ញាធរមិនអាចអនុញ្ញាតឲ្យមានការធ្វើបាតុកម្មនោះបានឡើយ ដោយថា គ្មានច្បាប់និងប៉ះពាល់ដល់សណ្ដាប់ធ្នាប់សង្គម។
លោក ទូច ណារ៉ុថ មានប្រសាសន៍ដូច្នេះថា ៖ «គាត់ហែហ្នឹង ថៃដកចេញឬអត់? អត់ទេ។ ដូច្នេះទុកឲ្យគេដោះស្រាយ។ ការហែក្បួនរបស់គាត់ហ្នឹង បានត្រឹមបង្កបញ្ហា ស្ទះចរាចរណ៍សណ្ដាប់ធ្នាប់ ហើយអាចឈានទៅមានបាតុភាពផ្សេងៗទៀត»។
លោក រ៉ុង ឈុន បានមានប្រសាសន៍ថា ការបង្ក្រាបរបស់អាជ្ញាធរ គឺជាការបំបិទសិទ្ធិសេរីភាពរបស់ប្រជាពលរដ្ឋ ៖ «បានតែបង្រ្កាបខ្មែរគ្នាឯង ប៉ុន្តែចំពោះចោរសៀមឈ្លានពាន ជាមួយប្រទេសជិតខាង ជាមួយបរទេស ទម្លាក់កន្ទុយខ្លាចគេ»។
គួរជម្រាបថា ការធ្វើបាតុកម្មនេះ គឺបានកើតឡើងមួយថ្ងៃ នៅមុនការចរចារវាងរដ្ឋមន្ត្រីក្រសួងការបរទេសកម្ពុជា-ថៃដើម្បី ស្វែងរកដំណោះស្រាយជម្លោះព្រំដែននៃប្រទេសទាំងពីរ៕
