វិទ្យុអាស៊ីសេរី
ដោយ មុំ សុផុន
គណបក្ស សមរង្ស៊ីនិងគណបក្សសិទ្ធិមនុស្សបានធ្វើសន្និសីទកាសែតរួមគ្នានៅ ថ្ងៃអង្គារនេះ ដោយនៅតែបង្ហាញពីជំហររបស់ខ្លួនបដិសេធនូវលទ្ធផលបោះឆ្នោតជ្រើស តាំងតំណាងរាស្ត្រអាណត្តិទី៤នេះ ។
AFP Photo
ស្ត្រី ពរកូននៅនឹងដៃដាក់សន្លឹកឆ្នោតចូលក្នុងហិបឆ្នោតនៅការិយាល័យបោះ ឆ្នោតមួយក្នុងទីក្រុងភ្នំពេញ កាលពីថ្ងៃទី២៧ ខែកក្កដា ឆ្នាំ២០០៨ ។លោក សម រង្ស៊ី ប្រធានគណបក្សសមរង្ស៊ីបានមានប្រសាសន៍ឲ្យដឹងថា លោកនឹងយកឯកសារនានាដែលទាក់ទងនឹងភាពមិនប្រក្រតីនៃការបោះឆ្នោតនោះ ទៅប្តឹងសហគមន៍អន្តរជាតិ ។
លោក សម រង្ស៊ី បានមានប្រសាសន៍ថា ៖ «ស្អែក ខានស្អែក ខ្ញុំទៅញូវយ៉កហើយ ខ្ញុំទៅអង្គការសហប្រជាជាតិ ។ ខ្ញុំទៅធ្វើទស្សកិច្ច ទៅអញ្ជើញតំណាងគណបក្សណាដែលមានគោលជំហរដូចយើង ។ ទៅធ្វើទស្សនកិច្ច ទៅអង្គការសហប្រជាជាតិ ទៅវ៉ាស៊ីនតោន ទៅប៉ារីស ទៅ Brussels យកឯកសារទាំងអស់ហ្នឹង ជាពិសេសឲ្យប្រទេសជាហត្ថលេខីនៃកិច្ចព្រមព្រៀងទីក្រុងប៉ារីស ថា អស់លោកបានចុះហត្ថលេខាលើកិច្ចព្រមព្រៀងទីក្រុងប៉ារីស អស់លោកបានសន្យា ធានាថា នឹងជួយឲ្យមានការបោះឆ្នោតត្រឹមត្រូវនៅប្រទេសកម្ពុជា ។ ឥឡូវត្រឹមត្រូវកន្លែងណា ? បើយើងចាប់បានឯកសារ ភាពមិនប្រក្រតី ដល់កម្រិតហ្នឹង អត់ត្រឹមត្រូវទេ ។ លួចសន្លឹកឆ្នោតមួយជាន់ហើយ ឥឡូវចង់មកលួចកៅអីទៀត អ៊ីចឹងបានខ្ញុំទៅប្ដឹងអន្តរជាតិហើយ កុំឲ្យទទួលស្គាល់ការបោះឆ្នោតហ្នឹង កុំឲ្យទទួលស្គាល់សភាហ្នឹង កុំឲ្យទទួលស្គាល់រដ្ឋាភិបាលហ្នឹង អត់ត្រឹមត្រូវទេ» ។
លោក សម រង្ស៊ី បានមានប្រសាសន៍ឲ្យដឹងទៀតថា គណបក្សសមរង្ស៊ីនិងគណបក្សសិទ្ធិមនុស្ស នៅតែជំរុញឲ្យមានការបោះឆ្នោតឡើងវិញនៅតាមបណ្តាខេត្តក្រុងមួយចំនួន ដែលគណបក្សទាំងពីរនេះរកឃើញថា មានភាពមិនប្រក្រតីក្នុងដំណើរការបោះឆ្នោតនោះ ។
លោកបានមានប្រសាសន៍បញ្ជាក់ទៀតថា ភាពមិនប្រក្រតីទាំងនោះមាន ៖ ការចេញទម្រង់១០១៨ច្រើនជាងគេ មានការលុបឈ្មោះប្រជាពលរដ្ឋច្រើនបំផុត ហើយលោកថា ខេត្តក្រុងណាដែលមានភាពមិនប្រក្រតីគឺជះឥទ្ធិពលដល់លទ្ធផលនៃ ការបោះឆ្នោត ។
ចំណែកឯគណបក្សសិទ្ធិមនុស្សបានបង្ហាញពីជំហររបស់ខ្លួនដែលបដិសេធ លទ្ធផលបោះឆ្នោតនោះ ហើយបន្តការរួបរួមជាមួយគណបក្សសមរង្ស៊ី ។
លោក អ៊ូ ច័ន្ទរ័ត្ន អគ្គលេខាធិការគណបក្សសិទ្ធិមនុស្សបានថ្លែងថា ៖ «មក ដល់ថ្ងៃនេះ ជំហររបស់គណបក្សសិទ្ធិមនុស្សនៅតែរឹងមាំដដែល ហើយយើងនឹងកៀកស្មាជាមួយគណបក្សសមរង្ស៊ីតទៅទៀត ក្នុងការបដិសេធនូវលទ្ធផលបោះឆ្នោត ពីថ្ងៃទី២៧ ខែកក្កដាកន្លងមកនេះ ហើយយើងនឹងបន្តរួបរួមជាមួយគណបក្សសមរង្ស៊ីនូវអ្វីដែលស្របច្បាប់ ហើយអ្វីដែលត្រូវសម្រាប់ប្រជាពលរដ្ឋខ្មែរ» ។
ចំណែកឯគណបក្ស នរោត្តម រណឫទ្ធិ ដែលធ្លាប់តែចូលរួមនិងបដិសេធលទ្ធផលឆ្នោតជាមួយនឹងគណបក្សសមរង្ស៊ី និងគណបក្សសិទ្ធិមនុស្សនោះ បែរជាប្រធានបក្សរបស់ខ្លួនព្រះអង្គម្ចាស់ នរោត្តម រណឫទ្ធិ ថ្លែងគាំទ្រលទ្ធផលនៃការបោះឆ្នោតនេះទៅវិញ ។
ទោះជាយ៉ាងណា លោក សម រង្ស៊ី បានឲ្យដឹងទៀតថាលោកមិនទាន់បានគិតពីការចូលរួមប្រជុំសភានោះទេ ដោយលោកផ្តោតការយកចិត្តទុកដាក់លើភាពមិនប្រក្រតីនៃការបោះឆ្នោត និងទទូចឲ្យមានការបោះឆ្នោតឡើងវិញ ។ ប៉ុន្តែមន្ត្រីជាន់ខ្ពស់នៃគណៈកម្មាធិការជាតិរៀបចំការបោះឆ្នោត ធ្លាប់ថ្លែងឲ្យដឹងថា ករណីទាំងនោះមិនអាចបង្កើតឲ្យមានដំណើការបោះឆ្នោតឡើងវិញនោះបាន ឡើយ ៕
