ដោយ សុខ សេរី
លោក ឧបនាយករដ្ឋមន្រ្តី ហោ ណាំហុង ជារដ្ឋមន្រ្តីក្រសួងការបរទេសកម្ពុជា គ្រោងនឹងដឹកនាំគណៈប្រតិភូជាន់ខ្ពស់មួយក្រុមឆ្ពោះទៅកាន់ប្រទេសថៃ សម្រាប់រយៈពេល២ថៃ្ង ចាប់ពីថៃ្ងទី១៨ ខែសីហា ខាងមុខនេះ ដើម្បីបើកការចរចាជាថ្មីដែលភាគីកម្ពុជាបានទាមទារឲ្យប្រទេសថៃដក កងទ័ពចេញពីតំបន់ប្រាសាទព្រះវិហាររបស់កម្ពុជានោះ។
AFP Photo
ទាហានខ្មែរដើរនៅក្នុងបរិវេណប្រាសាទព្រះវិហារ នៅលើភ្នំដងរែក នៃខេត្តព្រះវិហារ នាថ្ងៃ២១ កក្កដា ២០០៨ ។
ផ្អែកតាមប្រភពបានឲ្យដឹងថា គណៈប្រតិភូជាន់ខ្ពស់របស់កម្ពុជានិងថៃ គ្រោងនឹងបើកការចរចាទេ្វភាគីជាថ្មីនោះ នៅប្រទេសថៃ នៅថៃ្ងទី១៨ ខែសីហា ហើយបន្ទាប់មក គណៈប្រតិភូកម្ពុជា នឹងវិលត្រទ្បប់មកប្រទេសកម្ពុជាវិញនៅថៃ្ងទី១៩ ខែសីហា។
លោក ស៊ិន ប៊ុនធឿន មន្រ្តីអ្នកនាំពាក្យរបស់ក្រសួងការបរទេសកម្ពុជា បានមានប្រសាសន៍ប្រាប់វិទ្យុអាស៊ីសេរី ឲ្យដឹងថា សមាសភាពគណៈប្រតិភូខែ្មរដែលនឹងទៅបើកការចរចាទ្វេភាគីជាមួយនឹងថៃ នៅដើមសប្តាហ៍ខាងមុខនេះ គឺមានចំនួនប្រមាណ ១០រូប មកពីក្រសួងការបរទេស ក្រសួងការពារជាតិ និងមន្រ្តីមួយចំនួននៃគណៈកម្មាធិការដោះស្រាយវិវាទព្រំដែនកម្ពុជា។
លោក ស៊ិន ប៊ុនធឿន មានប្រសាសន៍ដូច្នេះថា ៖ «បញ្ហានេះ យើងចរចាបញ្ហាព្រំដែនយើង បញ្ហាការដកទ័ពអីហ្នឹង បញ្ហាដែលនៅសេសសល់ហ្នឹង យើងដោះស្រាយបណ្ដើរៗ»។
ទាក់ទងនឹងការបើកការចរចានៅពេលខាងមុខនេះ លោក វ៉ា គឹមហុង ប្រធានគណៈកម្មាធិការដោះស្រាយវិវាទព្រំដែនកម្ពុជា ដែលមានគម្រោងរួមដំណើរផងដែរនោះ បានមានប្រសាសន៍ថា ៖ «វាជាការបន្តកិច្ចការដែលយើងធ្វើនៅសៀមរាប ថ្ងៃ២៨ (កក្កដា) កន្លងមក»។
សុខ សេរី ៖ អ្វីដែលជាចំណុចមិនចុះសម្រុងគ្នា រវាងកម្ពុជានិងថៃ?
វ៉ា គឹមហុង ៖ «អាហ្នឹងយើងនិយាយមិនទាន់បានទេ ព្រោះយើងនៅក្នុងការចរចា។ ចរចាដើម្បីឲ្យចុះសម្រុងគ្នា…»។
លោក មឿង សុន ប្រធានអង្គការមូលនិធិទ្រទ្រង់អរិយធម៌ខែ្មរ បានមានប្រសាសន៍ជុំវិញការចរចាទេ្វភាគីរវាងថៃនិងកម្ពុជា ខាងមុខនេះថា ៖ «ក្ដីសង្ឃឹម វាមានតិច ដោយសារអី គឺដោយសារវត្តមានរបស់កងទ័ពថៃនិងសកម្មភាពរបស់គាត់ ហាក់ដូចអត់មានបង្ហាញភាពវិជ្ជមាននៃការសម្របសម្រួលការចរចាសោះ»។
គម្រោងនៃការបើកការចរចានៅថៃ្ងទី១៨-១៩ ខែសីហា ខាងមុខនេះ គឺជាការចរចាទ្វេភាគីលើកទី៣ហើយ រវាងកម្ពុជានិងថៃ ផ្តោតលើការដកកងទ័ពថៃចេញពីតំបន់ប្រាសាទព្រះវិហាររបស់កម្ពុជា ប៉ុន្តែភាគីថៃមិនបានដកកងទ័ពតាមការទាមទាររបស់កម្ពុជាទ្បើយ។
សូមរំឭកថា រដ្ឋមន្រ្តីការបរទេសកម្ពុជានិងថៃ កាលពីថៃ្ងទី២៨ ខែកក្កដា កន្លងទៅថ្មីៗនេះ បានបើកការចរចាទ្វេភាគីរួចម្តងទៅហើយនៅក្នុងខេត្តសៀមរាប ដោយភាគីទាំងសងខាង បានយល់ព្រមថា កងទ័ពនៃប្រទេសទាំងពីរមិនបើកការវាយប្រយុទ្ធគ្នាទេ គឺប្រកាន់យកនូវការដោះស្រាយដោយសន្តិវិធី។
ប៉ុនែ្ត ភាគីថៃនៅតែរក្សាកងទ័ពរបស់ខ្លួនជាដដែល ដែលមជ្ឈដ្ឋានជាច្រើនក្នុងប្រទេសកម្ពុជា មើលឃើញថា សកម្មភាពនោះគឺជាការឈ្លានពាននិងរំលោភលើអធិបតេយ្យរបស់កម្ពុជា៕
