វិទ្យុអាស៊ីសេរី
ដោយ កែវ និមល
មន្ត្រី អ្នកនាំពាក្យរដ្ឋាភិបាលបានឲ្យដឹងថា ក្រោយពេលគណបក្សហ៊្វុនស៊ិនប៉ិចមានការបែកបាក់គ្នាដោយមានមួយក្រុម ទៅចូលរួមជាមួយគណបក្សសមរង្ស៊ីនិងគណបក្សដទៃទៀត ថ្កោលទោសលទ្ធផលការបោះឆ្នោតនោះ រដ្ឋាភិបាលនឹងមានការដកមន្ត្រីគណបក្សហ៊្វុនស៊ិនប៉ិចមួយចំនួនចេញពី រដ្ឋាភិបាល ។
RFA Photo
និមិត្តសញ្ញានៃគណបក្សហ៊្វុនស៊ិនប៉ិច ។
លោក ខៀវ កាញារីទ្ធ រដ្ឋមន្រ្តីក្រសួងព័ត៌មាននិងជាអ្នកនាំពាក្យគណបក្សប្រជាជនកម្ពុជា បានមានប្រសាសន៍នៅថ្ងៃទី៣០ កក្កដានេះ ថា រដ្ឋាភិបាលដែលមានគណបក្សប្រជាជនជាអ្នកដឹកនាំនឹងដកមន្ត្រីមួយចំនួន នៃគណបក្សហ៊្វុនស៊ិនប៉ិចដែលស្និទ្ធជាមួយលោក កែវ ពុទ្ធរស្មី ហើយរក្សាទុកមន្ត្រីមួយចំនួនដែលស្និទ្ធជាមួយលោក ញឹក ប៊ុនឆៃ ។
លោក ខៀវ កាញារីទ្ធ បានឲ្យដឹងថា ៖ «គណបក្សប្រជាជនបានសម្រេចយក ហ៊្វុនស៊ិចប៉ិច ព្រោះហ៊្វុនស៊ិចប៉ិចបែកជា២ អ៊ីចឹងយើងយកហ៊្វុនស៊ិនប៉ិចដែលជារបស់លោក ញឹក ប៊ុនឆៃ គឺជាដៃគូក្នុងរដ្ឋាភិបាល ។ ហើយព្រឹកមិញឯកឧត្ដម សុខ អាន បានឲ្យ សេរីរ័ត្ន ចេញពីរដ្ឋាភិបាលហើយ ល្ងាចនេះលោក កែវ ពុទ្ធរស្មី នឺងទៅចេញពីរដ្ឋាភិបាល» ។
ព្រះអង្គម្ចាស់ ស៊ីសុវត្ថិ សេរីរ័ត្ន អនុប្រធានគណបក្សហ៊្វុនស៊ិនប៉ិចដែលមានឈ្មោះត្រូវដកចេញនោះបានមាន បន្ទូលឲ្យដឹងថា មកទល់នឹងរសៀលថ្ងៃទី៣០ កក្កដានេះ ព្រះអង្គនៅមិនទាន់បានទទួលដំណឹងនោះជាផ្លូវការនៅឡើយទេ ។
ព្រះអង្គម្ចាស់ ស៊ីសុវត្ថិ សេរីរ័ត្ន បានមានបន្ទូលថា ៖ «មិនទាន់ ឮអីផ្ទាល់ពីសម្ដេចនាយកផង គ្រាន់តែឮល្ហៀងៗអ៊ីចឹង ប៉ុន្តែមិនដែលនិយាយផង មានតែប៉ុណ្ណឹង ។ អត់ទាន់ធ្វើអត្ថាធិប្បាយអីបានទេ ចាំមើលដកសិនបានយើងធ្វើអត្ថាធិប្បាយបាន ពីព្រោះហ៊្វុនស៊ិនប៉ិចដឹកនាំដោយគណៈកម្មការអចិន្ត្រៃយ៍ ត្រូវតែគណៈកម្មការអចិន្ត្រៃយ៍ចាត់វិធានការរបៀបម៉េច បានយើងអាចចាត់ការរឿងនយោបាយតទៅអនាគតយ៉ាងម៉េច» ។
កែវ និមល ៖ ប៉ុន្តែឥឡូវព្រះអង្គទទួលស្គាល់ថា មានការបែកបាក់ផ្ទៃក្នុងរវាងព្រះអង្គ និងឯកឧត្ដម កែវ ពុទ្ធរស្មី ជាមួយនិង លោក ញឹក ប៊ុនឆៃ ដែរក្រាបទូល ?
ស៊ីសុវត្ថិ សេរីរ័ត្ន ៖ មិនទទួលស្គាល់ទេ ។ គណបក្សហ៊្វុនស៊ិនប៉ិចជាគណបក្សសេរីណាស់ មានលទ្ធិប្រជាធិបតេយ្យពិតប្រាកដ មនុស្សម្នាក់ៗអាចចេញយោបល់បាន ។
កាលពីថ្ងៃទី២៨ កក្កដាកន្លងមកនេះ ព្រះអង្គម្ចាស់ ស៊ីសុវត្ថិ សេរីរ័ត្ន តំណាងឲ្យគណបក្សហ៊្វុនស៊ិនប៉ិចបានទៅចូលរួមជាមួយគណបក្សសមរង្ស៊ី គណបក្សសិទ្ធិមនុស្ស និងគណបក្ស នរោត្តម រណឫទ្ធិ អំពាវនាវឲ្យសហគមន៍អន្តរជាតិនិងជាតិ កុំទទួលស្គាល់លទ្ធផលការបោះឆ្នោតកាលពីថ្ងៃទី២៧ កក្កដាកន្លងទៅ ដោយបានចាត់ទុកថាការបោះឆ្នោតនោះមានការបន្លំនិងការចាត់ចែងដោយ គណបក្សប្រជាជនកម្ពុជាតាមរយៈគណៈកម្មាធិការជាតិរៀបចំការបោះឆ្នោត ។
ប៉ុន្តែសេចក្តីថ្លែងការណ៍នោះត្រូវបានគណបក្សហ៊្វុនស៊ិនប៉ិចមួយ ទៀតដែលគេជឿថាជាក្រុមរបស់លោកអគ្គលេខាធិការ ញ៉ឹក ប៊ុនឆៃ នោះ បានបដិសេធ ។
កាលពីថ្ងៃទី២៩ កក្កដានេះផងដែរ លោក កែវ ពុទ្ធរស្មី ប្រធានគណបក្សហ៊្វុនស៊ិនប៉ិចក្នុងនាមដើមបណ្តឹងបានសុំដកពាក្យប្ដឹង ចំពោះព្រះអង្គម្ចាស់ នរោត្តម រណឫទ្ធិ ពីបទបានបំពានយកដីកម្មសិទ្ធិរបស់គណបក្សហ៊្វុនស៊ិនប៉ិច និងសុំឲ្យតុលាការលើកលែងទោសចំពោះព្រះអង្គផងដែរ ។
ដោយសារពាក្យបណ្តឹងនេះត្រូវបានតុលាការក្រុងភ្នំពេញកាត់ទោសដាក់ គុកនិងផាកពិន័យប្រាក់ព្រះអង្គ ហើយព្រះអង្គម្ចាស់ នរោត្ដម រណឫទ្ធិ បានគង់និរទេសខ្លួននៅប្រទេសម៉ាឡេស៊ីមិនបានចូលរួមការឃោសនាបោះ ឆ្នោតបានទេ ៕
ប្រភព ៖ វិទ្យុអាស៊ីសេរី
