វិទ្យុអាស៊ីសេរី
ដោយ គឹម ពៅសុតន្ត
មេ ដឹកនាំបក្សប្រឆាំង លោក សម រង្ស៊ី នៅថ្ងៃអង្គារនេះបានអំពាវនាវដល់ពលរដ្ឋ និងអ្នកសង្កេតការណ៍ជាតិ និងអន្តរជាតិ ឲ្យច្រានចោលលទ្ធផលនៃការបោះឆ្នោតកន្លងមកនេះ បន្ទាប់ពីគម្លាតនៃសំឡេងអ្នកគាំទ្រគណបក្សប្រជាជនកម្ពុជា និងក្រុមអ្នកប្រឆាំងឃ្លាតឆ្ងាយគ្នាដាច់ស្រឡះ ។
AFP Photo
ប្រធានគណបក្សសមរង្ស៊ី លោក សម រង្ស៊ី បោះឆ្នោតនៅការិយាល័យបោះឆ្នោតមួយក្នុងខែត្រកំពង់ចាម កាលពីថ្ងៃ២៧ កក្កដា ២០០៨ ។
សេចក្តីអំពាវនាវបានធ្វើឡើងនៅក្នុងសន្និសីទកាសែត ដោយប្រកាសទាមទារឲ្យមានការបោះឆ្នោតឡើងវិញនៅទូទាំងប្រទេស ដោយសារតែមនុស្សរាប់សែននាក់បានបាត់ឈ្មោះនៅក្នុងពេលបោះឆ្នោតនោះ ។
លោក សម រង្ស៊ី បានចោទថាការកើនឡើងនៃសំឡេងគាំទ្ររបស់គណបក្សប្រជាជនកម្ពុជានៅ អាណត្តិនេះ ដោយសារតែការបន្លំសន្លឹកឆ្នោតតាមទម្រង់១០១៨ និងការបំបាត់ឈ្មោះអ្នកបោះឆ្នោតដែលគណបក្សរបស់លោកបានរកឃើញនៅ ទីក្រុងភ្នំពេញមានចំនួនជាច្រើនម៉ឺននាក់ និងបន្តរកឃើញនៅតាមបណ្តាខេត្តមួយចំនួនទៀត ។
លោក សម រង្ស៊ី បានមានប្រសាសន៍ថា ៖ «ច្រើនណាស់មិនអាចអនុគ្រោះ បានទេ ការបោះឆ្នោតនេះត្រូវតែឆាចោល ត្រូវតែរៀបចំការបោះឆ្នោតឡើងវិញដោយបញ្ចូលឈ្មោះអ្នកដែលបាត់ឈ្មោះ អ្នកដែលត្រូវគេលុបឈ្មោះ ចូលវិញ ឲ្យពលរដ្ឋខ្មែរទាំងអស់មានសិទ្ធិបោះឆ្នោតដូចគ្នា ស្មើគ្នា គ្រប់គ្នា ហ្នឹងហើយដែលហៅថាគោលការណ៍ប្រជាធិបតេយ្យ ។ បោះឆ្នោតបែបនេះអត់ប្រជាធិបតេយ្យ» ។
តាមលទ្ធផលឆ្នោតបណ្តោះអាសន្នរបស់អង្គការខុមហ្វ្រែល ដែលទទួលបានពីក្រុមអ្នកសង្កេតការណ៍របស់ខ្លួននៅការិយាល័យបោះ ឆ្នោតចំនួន ១១៧០ការិយាល័យ បានអះអាងថាគណបក្សប្រជាជនកម្ពុជា បានទទួលអាសនៈប្រហែល ៩០កៅអី គណបក្សសមរង្ស៊ី បានប្រហែល២៦កៅអី គណបក្សសិទ្ធិមនុស្ស បានទទួលអាសនៈប្រហែល៣កៅអី គណបក្ស នរោត្តម រណឫទ្ធិ បានទទួល២កៅអី និងគណបក្សហ៊្វុនស៊ិនប៉ិច បានទទួល២កៅអី ។
ក្រុមអ្នកប្រឆាំងបានចោទថាចំនួនមនុស្សរាប់សែននាក់ដែលបាត់ ឈ្មោះសុទ្ធសឹងជាអ្នកគាំទ្រគណបក្សផ្សេងៗពីគណបក្សប្រជាជនកម្ពុជា ហើយគេនឹងប្តឹងផ្តល់បញ្ហានេះទៅកាន់តុលាការ ។
អគ្គលេខាធិការជាតិរៀបចំការបោះឆ្នោត លោក ទេព នីថា មានប្រសាសន៍ថាគ.ជ.ប.ស្វាគមន៍ទទួលបណ្តឹង ប៉ុន្តែតាមលក្ខណៈច្បាប់គេមិនអាចអនុញ្ញាតឲ្យមានការបោះឆ្នោតឡើង វិញបានឡើយ ។
លោកបន្តទៀតថាមានសម្អាតបញ្ជីឈ្មោះអ្នកបោះឆ្នោតមានពិតមែន ប៉ុន្តែឈ្មោះដែលគេលុបចោលមានចំនួនប្រហែល៥៨៥ពាន់នាក់ប៉ុណ្ណោះដែល សុទ្ធសឹងតែជាឈ្មោះខ្មោច ។
លោក ទេព នីថា បានមានប្រសាសន៍ថា ៖ «និយាយថាការបាត់ឈ្មោះ១លាន កន្លះនោះគឺដូចជាគ្មានទេ ។ ក្នុងឆ្នាំនេះគ.ជ.ប.លុបឈ្មោះចេញពីបញ្ជីបោះឆ្នោតប្រមាណជា ៥៨៥ពាន់នាក់ប៉ុណ្ណោះ ហើយដល់បាត់ឈ្មោះ១លានកន្លះនោះដូចជាមិនដឹងបានលេខពីណាទេ ?» ។
លោកបន្តទៀតថាគ.ជ.ប.នឹងចាប់ផ្តើមទទួលពាក្យបណ្ដឹងនៅបន្ទាប់ពី ការប្រកាសលទ្ធផលនៃការបោះឆ្នោតបណ្ដោះអាសន្ននៅថ្ងៃទី៩ សីហានេះ ។
គួរជម្រាបជូនផងដែរថាគណបក្សទាំងបួនមានគណបក្សសមរង្ស៊ី គណបក្សសិទ្ធិមនុស្ស គណបក្ស នរោត្តម រណឫទ្ធិ និងគណបក្សហ៊្វុនស៊ិនប៉ិច បានចងសម្ព័ន្ធគ្នាក្នុងការច្រានចោលលទ្ធផលនៃការបោះឆ្នោតកន្លងមក នេះ ៕
ប្រភព ៖ វិទ្យុអាស៊ីសេរី
